ബസ് ജീവനക്കാരുടെ മത്സരയോട്ടവും ഗുണ്ടായിസവും അവസാനിപ്പിക്കണം: മുസ്ലിം യൂത്ത് ലീഗ്

ബസ് ജീവനക്കാരുടെ മത്സരയോട്ടവും ഗുണ്ടായിസവും അവസാനിപ്പിക്കണം: മുസ്ലിം യൂത്ത് ലീഗ്

തളിപ്പറമ്പ്: നഗരത്തിൽ വർദ്ധിച്ചുവരുന്ന സ്വകാര്യ ബസ് ജീവനക്കാരുടെ മത്സരയോട്ടവും ഗുണ്ടായിസവും അവസാനിപ്പിക്കാൻ മോട്ടോർ വാഹന വകുപ്പ് കർശനമായ പരിശോധനയും നടപടികളും സ്വീകരിക്കണമെന്ന് മുസ്ലിം യൂത്ത് ലീഗ് തളിപ്പറമ്പ് മുനിസിപ്പൽ കമ്മിറ്റി ആവശ്യപ്പെട്ടു. കഴിഞ്ഞ ദിവസം നഗരത്തിലുണ്ടായ ബസ് അപകടത്തിന്റെയും ജീവനക്കാർ തമ്മിലുണ്ടായ സംഘർഷത്തിന്റെയും പശ്ചാത്തലത്തിലാണ് യൂത്ത് ലീഗ് നേതൃത്വം ജോയിന്റ് ആർ.ടി.ഒ ഷാനവാസ് കരീമിന് നിവേദനം നൽകിയത്.

ബസ് ജീവനക്കാരുടെ അശ്രദ്ധമായ ഡ്രൈവിംഗ് മൂലം നിരവധി അപകടങ്ങളാണ് നിരന്തരമുണ്ടാകുന്നത്. മത്സരയോട്ടത്തെ തുടർന്നുണ്ടാകുന്ന തർക്കങ്ങളും കയ്യാങ്കളിയും തളിപ്പറമ്പിൽ നിത്യസംഭവമായി മാറിയിരിക്കുകയാണ്. ഇത് യാത്രക്കാരുടെ സുരക്ഷയ്ക്ക് വലിയ ഭീഷണിയുയർത്തുന്നു.

വിദ്യാർത്ഥികളോടുള്ള ബസ് ജീവനക്കാരുടെ മോശം പെരുമാറ്റവും നിവേദനത്തിൽ ചൂണ്ടിക്കാട്ടി. ബസ് സ്റ്റാൻഡിൽ നിന്നും പുറപ്പെടുന്ന സമയം വരെ വിദ്യാർത്ഥികളെ പുറത്തുനിർത്തുകയും, വണ്ടി എടുത്ത ശേഷം അപകടകരമായ രീതിയിൽ ഓടിക്കയറാൻ പ്രേരിപ്പിക്കുകയും ചെയ്യുന്നത് പതിവാണ്. ഇത്തരം നിയമലംഘനങ്ങൾക്കെതിരെ കർശന നടപടി വേണമെന്ന് നേതാക്കൾ ആവശ്യപ്പെട്ടു.

മുസ്ലിം യൂത്ത് ലീഗ് മുനിസിപ്പൽ പ്രസിഡന്റ് കെ. മുഹമ്മദ് അഷ്‌റഫ്, ജനറൽ സെക്രട്ടറി പി.എ. ഇർഫാൻ, ഭാരവാഹികളായ സി.കെ. മദനി, കെ.എസ്. റഫീഖ്, സി.പി. നൗഫൽ എന്നിവരാണ് നിവേദക സംഘത്തിലുണ്ടായിരുന്നത്.